不經不覺Tesla的成名作Model S已推出7年，經歷過熱賣、加稅、炒價之後，現時已回歸平淡，在易手市場的價格亦步入正常階段，一直對電動車有興趣而又未入手的朋友終可安心挑選。現時年份不太舊而又具實力的90D型號，都已差不多跌至新車半價，還不乏低里數優質盤，就如這台2016年Model S 90D，只行約15,200km，都只賣$408,000而已。

優質最重要

Model S推出過的型號超過十款，現時購買已冧價的易手車，當然選電量較高的中高級型號為佳。其中2015年開始推出的90D便是熱門型號，以前後雙摩打四驅佈局，輸出達417匹及658Nm。0-100km/h只需4秒夠快之餘，耗電又不會像P90D高性能型號般快，續航距離可達473km僅次於頂級100D型號。

不過市場中有大量易手Model S 90D放售，質素極之參差，同是2016年製易手價可由35萬去到80萬以上都有，但鑑於電池損耗的問題，絕不可貪平。今次這台就屬少有優質盤之一，因3年來都只行約15,200km，車身內外都達到9成新，但定價只比10萬8萬里數的最賤價易手盤貴3、4萬元。全因車上並無加入太多option，才會比質素相近的車盤平。以代步用途來說，實在抵玩，又或將省回來的易手價用作自行升級，可能比原裝option更吸引。

規格表

製造/出牌年份：2016/2016

首數/里數：1字牌簿/約15,200km

動力：90kWh鋰離子電池配前後電馬達

馬力：417hp

扭力：658Nm

傳動：單速自動波

當年新車價：約$770,000

易手價：$408,000

查詢：泰來車行（9288 1202）