在香港駕駛「陷阱處處」，隨時被人抄牌！經常聽到身邊駕車的朋友嘆道，泊車在街食個飯被抄牌，公路行快少少又被影相，掉頭又被告Cut雙白線。筆者都會問「到底聽緊啲乜」？自己開車違法，可以將成件事顛倒黑白，將違法行為合理化。換另一角度亦難怪的，香港人善忘又心急，筆試合格再考取駕駛執照後，甚麼交通法例都拋諸腦後。其實圍繞我們日常生活中，的而且確有不少規矩或指引的存在，背後原來是由法例衍生而來的，若果大家無視這類指示，分分鐘觸犯法例。

有次見到一輛超級跑車駛進油站，右邊玻璃窗緩緩降下，一位架太陽眼鏡的「型男」，以右手食指與中指夾著信用卡伸出窗外，職員問：「先生入邊隻油？係咪信用卡入滿？」型男回應：「你唔識我呢架車？梗係入超級啦！戇居！」職員被噴一面屁，但仍忍氣吞聲，之後職員同呢位開超級跑車入超級汽油的超級「型男」講：「咁唔該你熄車，你架車好嘈呀！入油要熄引擎架！」

「型男」被入油員「還拖」，條氣當然唔順，之後雙方在油站出動「**XYZ**」字句互相問候僵持不下，油站站長惟有報警處理。「型男」愛面子，即使警察到來亦十分囂張，還高聲問邊條法例規定在油站要熄引擎，還稱超級跑車開關引擎會傷車等等。對！法例沒有規定進入油站要熄車，但根據香港法例第374G《道路交通（交通管制）規例》第42條1b內文是這樣說的，任何司機當在道路上的車輛的油箱蓋被移去時，不得致使或容許該車輛的引擎開動，任何人無合理辯解，即屬犯罪，可處罰$2,000。上述法例不難理解，就是入油期間油缸蓋打開時必須熄車，結果這位「型男」當堂無言收聲。

其實在外國有不少油站起火的案例，為自己安全，熄車這樣簡單，又何必鬥氣呢？